ՀՀ սննդամթերքի անվտանգության տեսչական մարմնի պաշտոնատար անձինք կունենան նաև աշնանային կիսավերարկու

Կառավարությունը նոր որոշում է ընդունել, որով նախատեսվում է ՀՀ սննդամթերքի անվտանգության տեսչական մարմնի պետական վերահսկողություն իրականացնող պաշտոնատար անձանց համազգեստը կիրառելի դարձնել:

Հիմնավորման մեջ նշվում ե, որ պաշտոնատար անձանց կողմից համազգեստի կրման արդյունքում անհրաժեշտություն է առաջացել տարանջատել մեկ տեսակի կիսավերարկուն՝սահմանելով  աշնանային և ձմեռային կիսավերարկու, քանի որ ներկայիս կիրառվող կիսավերարկուն բավականին հաստ տեսակի է և հնարավոր չէ օգտագործել աշնանը և գարնանը:

Համազգեստի տարրերի տեսականու ավելացման անհրաժեշտությունը պայմանավորված է տարածքի բնակլիմայական պայմաններով, մասնավորապես՝ ցուրտ ձմեռներով և  համեմատաբար ավելի մեղմ գարուն/աշուններով, որի արդյունքում նույն տեսակի կիսավերարկուն կրելը դառնում է ոչ կիրառելի և անհարմար:

Նախագիծը մշակվել է ՀՀ վարչապետի աշխատակազմի տեսչական մարմինների աշխատանքների համակարգման գրասենյակի և Հայաստանի Հանրապետության սննդամթերքի անվտանգության տեսչական մարմնի կողմից համատեղ:

Նախագծի ընդունմամբ ակնկալվում է ՀՀ սննդամթերքի անվտանգության տեսչական մարմնի պետական վերահսկողություն իրականացնող պաշտոնատար անձանց համազգեստը կիրառելի դարձնել և  վերջիններիս տրամադրել ինչպես աշնանային, այդպես էլ ձմեռային կիսավերարկու։