Հայաստանը կատաղիորեն դիմադրեց կարգավիճակ Մեղրիի դիմաց տարբերակին. Ի՞նչ են խոսում փաստերը

Օրեր առաջ Նիկոլ Փաշինյանը նորից խոսեց Մեղրիի այսպես կոչված փոխանակման ծրագրի մասին: Ինչպես միշտ, առանց փաստերի Փաշինյանը անհասցե մեղադրանքներ հնչեցրեց, հետո դրանցից եզրահանգումներ արեց:

Պատմական իրադարձությունները վերախմբագրելու գայթակղությունը որքան էլ մեծ լինի, ամեն դեպքում կան իրողություններ, որոնք անտեսել անհնար է: Կան փաստեր, կան մարդիկ, կան ապացույցներ: Ստորև ներկայացնում ենք մի փոքր հատված Ֆիլիպ Ռեմլերի հեղինակած մենագրությունից:

Նշենք, որ Ռեմլերիը աշխատել է ԱՄՆ Պետքարտուղարությունում և ԵԱՀԿ-ում: Նա մեծ մասնակցություն է ունեցել հակամարտությունների կարգավորման գործում՝ ներառյալ Աբխազիայի, Չեչնիայի, Լեռնային Ղարաբաղի, Հարավային Օսիայի: Ստորև մեջբերումներ ենք ներկայացնում Ֆիլիպ Ռեմլերի «Շղթայված Կովկասին. Խաղաղության հաստատման գործընթացը Ղարաբաղում, 1987-2012թթ.» զեկույցից:

«Ադրբեջանական կողմի առաջարկած Լեռնային Ղարաբաղի կարգավիճակ Մեղրիի դիմաց  տարբերակը կատաղի դիմադրության է արժանացել Հայաստանի կողմից»։ Այս մասին գրում է Ֆիլիպ Ռեմլերը նշված զեկույցի մեջ, որը հրապարակվել է Խաղաղության միջազգային ինստիտուտի կողմից 2016 թվականին։

Ռեմլերը Ռոբերտ Քոչարյանին որակում է որպես շատ սկզբունքային և կոշտ առաջնորդ, ում հաջողվել էր հասնել նրան, որ արդեն Քի Ուեսթի համաձայնագրի շրջանակներում դիտարկվում էր Արցախի կարգավիճակի փոխանակումը Մեղրիով անցնող ճանապարհի հետ, որն ամբողջությամբ պետք է մնար ՀՀ ինքնիշխանության ներքո։

«2001 թվականի սկզբին համանախագահները կանգ առան մի առաջարկի վրա, որը շարունակում էր թեքվել դեպի հայկական կողմը, որն այդքան կտրուկ մերժել էր 1999 թվականի ծրագիրը: Համանախագահների նոր առաջարկը պահպանում էր հայկական ինքնիշխանության ձեռքբերումները Լեռնային Ղարաբաղի և Լաչինի նկատմամբ, բայց այն Ադրբեջանին ոչինչ չէր տալիս, միայն դեպի Նախիջևան մուտքի ոչ սուվերեն միջանցք՝  Մեղրու շրջանում: Երբ ադրբեջանցի պատվիրակը ծանոթանում է առաջարկվող տարբերակին, նա միանգամից արձագանքում է, որ Ալիևը երբեք չի համաձայնի այդ առաջարկին, քանի որ այն ամբողջովին բավավարում է ՀՀ շահերը, իսկ Ադրբեջանին ոչինչ չի տալիս»,- գրել է նա:

Թե ինչքանով է համապատասխանում տեղի ունեցածը Փաշինյանի ներկայացրածին, թողնենք առանց մեկնաբանությունների, իսկ Ֆիլիպ Ռեմլերի ընդարձակ զեկույցին ամբողջությամբ կարող եք ծանոթանալ այստեղ: