518 հազար դոլար՝ գործատուների և աշխատանք փնտրողների համար միասնական պետական առցանց հարթակի ստեղծման համար

ՀՀ-ում գործատուների և աշխատանք փնտրող անձանց համար միասնական պետական առցանց հարթակ ստեղծելու համար 2022թ.-ի մարտի 14 -ին Հայաստանի Հանրապետության և Եվրասիական զարգացման բանկի միջև կնքվել է «Աշխատանքի էլեկտրոնային բորսա ծրագիր» 518 հազար ԱՄՆ դոլարի դրամաշնորհի տրամադրման համաձայնագիր: 

Հաշվի առնելով սոցիալական աջակցության և զբաղվածության ոլորտների հիմնախնդիրները լուծելու առաջնահերթությունը՝ Հայաստանի Հանրապետության աշխատանքի և սոցիալական հարցերի նախարարությունը ««Նորք» սոցիալական ծառայություննների տեխնոլոգիական և իրազեկման կենտրոն» հիմնադրամի հետ կնքել է լրացուցիչ համաձայնագիր՝ վերոնշյալ դրամաշնորհային ծրագիրն իրականացնելու նպատակով:

Նախագծով Հայաստանի Հանրապետության պետական բյուջեի եկամուտները և ծախսերը կավելանան 234725.8  հազար դրամով:

Ծրագրի հիմնական խնդիրն է ՀՀ-ում գործատուների և աշխատանք փնտրող անձանց համար միասնական պետական առցանց հարթակ ստեղծելը, որը կինտեգրվի Եվրասիական տնտեսական միության (ԵԱՏՄ) տարածքում գործող նմանատիպ գործիքների հետ՝ նպաստելով միասնական աշխատաշուկայի ձևավորմանը։ Ծրագիրը բաղկացած է 4 բաղադրիչներից՝

Բաղադրիչ 1.  Աշխատանքի էլեկտրոնային բորսայի նախագծում, մշակում եւ ներդրում;

Բաղադրիչ 2.  Տեխնիկական միջոցներով ապահովում;

Բաղադրիչ 3.  Աշխատանքի էլեկտրոնային բորսայի մասին հասարակության իրազեկում;

Բաղադրիչ 4.  Ծրագրի կառավարում։