«Ապրելու երկիր» կուսակցությունը պահանջով դիմել է կառավարությանը

ՀՀ կառավարության շենքի դիմաց էին  հավաքվել  Փարաքար խոշորացված համայնքի բնակիչները, ովքեր չեն ընդունում համայնքի ղեկավարի ընտրության արդյունքները։ Կազմակերպվել  է ստորագրահավաք  և ընտրողների 60 տոկոսը միացել է ստորագրահավաքին։

Լրագրողների հետ զրույցում «Ապրելու երկիր» կուսակցության քաղաքական խորհրդի անդամ Արաքսյա Գրիգորյանը ներկայացրեց  «Ապրելու Երկիր» խմբակցության՝ հունվարի 3-ին կառավարությանը գրավոր ներկայացված պահանջը, այն է՝  դադարեցնել ավագանու լիազորությունները և նշանակել ավագանու նոր ընտրություններ՝ հիմք ընդունելով ՏԻՄ-երի մասին օրենքի 69-րդ հոդվածի 2-րդ կետը։ Ըստ այդ դրույթի  երկշաբաթյա ժամկետում, եթե համայնքի ղեկավար չի ընտրվում, ապա կառավարությունը նշանակում է նոր, ավագանու արտահերթ ընտրություններ։

«Ստորագրագրահավաքին միացել է մոտ 6000 մարդ, ովքեր պահանջում են կառավարությունից՝ պատասխանելու խմբակցության գրությանը, որովհետև մինչև օրս կառավարությունը քայլեր չի ձեռնարկել, անգամ գրությանը չի պատասխանել»,-ասաց նա։

Արաքսյա Գրիգորյանը հայտնեց, որ գրությունն ուղղված է աշխատակազմի ղեկավար Արայիկ Հարությունյանին, պահանջում են նրա կամ աշխատակազմից որևէ մեկի հետ հանդիպում, հանձնելու ստորագրություններն ու պարզաբանելու, թե ինչո՞ւ չեն արձագանքում կուսակցության գրությանը։