Ռոբերտ Քոչարյանն ազատ է արձակվել

ՀՀ վերաքննիչ դատարանը հրապարակեց  ՀՀ երկրորդ նախագահ Ռոբերտ Քոչարյանի խափանման միջոցի վերաբերյալ որոշումը: 

Ալեքսանդր Ազարյանի նախագահությամբ դատարանը բավարարեց պաշտպանների բողոքը, և Ռոբերտ Քոչարյանն ազատ արձակվեց:

Նիստից հետո լրագրողների հետ կարճ զրույց ունեցավ փաստաբան Ռուբեն Սահակյանը:

Ներկայացնում ենք զրույցի տեսանյութն ու սղագրությունը:

- Դատարանը հրապարակեց որոշման եզրափակիչ մասը և հայտարարեց, որ վերացնում է, բավարարում է փաստաբանների, պաշտպանների բողոքը, վերացնում է առաջին ատյանի դատարանի որոշումը հաշվի առնելով, որ Ռոբերտ Քոչարյանը անձեռնմխելի է:

- Նախագահն ինչպե՞ս տարավ որոշումը:

- Շատ հանգիստ:

- Գրավի դիմա՞ց է ազատ արձակվել:

- Ոչ, անձեռնմխելի է:

- Պատգամավորների երաշխագի՞րն է այստեղ ...

- Ոչ, օգտվել է անձեռնմխելիության իրավունքից: Չի կարող անձը ենթարկվել քրեական հետապնդման և պատասխանատվության իր պաշտանավարման և իր պաշտոնավարումից հետո, եթե իր գործողությունները բխել են իր կարգավիճակից:

- Այսինքն առաջին ատյանի դատարանի որոշումը հակաօրինակա՞ն էր:

- Այո:

- Դատավարությունը հիմա ի՞նչ ընթացքով պետք է ընթանա հիմա, որպես փաստաբան մանրամասնեք:

- Այդ հարցը տվեք քննչական մարմիններին: Չեմ ուզում խոսել, որովհետև քննիչն ասեց, որ արգելում է խոսել:

- Բավարարվա՞ծ եք դատարանի որոշումից:

- Դատարանի որոշումից այո բավարարված ենք: Եթե անձեռնմխելիության հարցը էսպես լուծվեց, ապա մնացած հարցերին դատարանը չպետք է անդրադառնար:

- Դու՞րս է եկել դատարանից Ռոբերտ Քոչարյանը:

- Այո, դուրս է եկել և արդեն մեկնել է:

Ասում էիք քաղաքական հետապնդում է, արդարություն չկա: Փոխվե՞լ է ձեր տեսակետը:

- Ոչ, չի փոխվել: Մինչ այս պահը այդպիսին էր:

- Հետագա գործողությունները ո՞րոնք են լինելու:

- Սպասում ենք, ես համոզված եմ, որ նախաքննական մարմինը, քրեական հետապնդման մարմինը կբողոքարկի դատարանի այս որոշումը:

- Ձեր հետագա քայլերի մասին կխոսե՞ք:

- Մեր հետագա քայլերը՝ սպասել քրեական հետապնդման մարմնի գործողություններին և ըստ այդմ գործել:

- Դատական ատյաններում ընդհանուր առմամբ հարցը սպառված է, գործը փակվա՞ծ է:

- Ոչ, սպառված չէ, քանի որ կա առջևում վճռաբեկ դատարան:

- Քրեական գործն էլ պետք է կարճվի: Բայց այդ հիմքով հնարավո՞ր է:

- Դա հետագայի խնդիր է: Շատ: Կարող են առանց դատարանի միջնորդության ինքնուրույն գալ այդ կարծիքին:

- Առաջին ատյանի դատարանը չգիտե՞ր, որ անձեռնմխելի է:

- Գիտե՞ք, ես այստեղ գալուց առաջ մի փոքրիկ թեզ պատրաստեցի բոլոր նրանց, ովքեր ասում են, որ անձեռնմխելիությունից չի օգտվում: Բոլոր նրանք, ովքեր իմ կարծիքին հակառակը, մեր փաստաբանական խմբի կարծիքին հակառակ կարծիք են հայտնում անձեռմխելիության հարցի հետ կապված... Հարց նրանց, ով գտնում է, որ հանրապետության նախագահն իր լիազորությունների ժամկետում և դրանից հետո կարող է հետապնդվել և պատասխանատվության ենթարկվել իր կարգավիճակից բխող գործողությունների համար: Եթե կարող է ենթարկվել, ապա իր լիազորությունների ժամկետում, իր կարգավիճակից բխող գործությունների համար հետապնդելու և պատասխանատվության ենթարկելու համար չպե՞տք է արդյոք գործեր համապատասխան ընթացակարգ, ինչպիսին օրինակ սահմանված է սահմանադրության 96 և 193 հոդվածներով պատգամավորի և մարդու իրավունքների պաշտպանի համար, չէ՞ որ նրանց համար սահմանված է այդ ընթացակարգը, եթե նրանց փորձում են ենթարկել քրեական հետապնդման, ապա պետք է ԱԺ-ն տա իր համաձայնությունը: Հանրապետության նախագահի համար պաշտոնավարման ժամկետի համար նման կարգ չի սահմանել, ինչո՞ւ, որովհետև չի կարող ենթարկվել պատասխանատվության: Ինչ վերաբերվում է պաշտոնավարումից հետո պատասխանատվության ենթարկելուն, ապա դրա անհրաժեշտությունը չկա, որովհետև չի կարող ենթարկվել, առհասարակ: Նայեք այլ պետությունների սահմանադրությունները:

- Այսինքն, պարոն Քոչարյանը բոլոր տեսակի պատասխանատվություններից ազատվո՞ւմ է:

- Այս պահի դրությամբ նա մեղադրյալ է: Այս պահի դրությամբ, նա մեղդրյալի կարգավիճակում է: Ես չեմ կարող ասել, դա իմ խնդիրը չի:

- Իսկ ի՞նչ ասեց Ռոբերտ Քոչարյանը, որևէ բան ասե՞լ է:

- Ոչ, ոչինչ չի ասել:

- Իսկ որտեղ է հիմա, ո՞ւր գնաց:

- Ճիշտն ասած՝ չհարցրեցի:

- Ասացիք, որ նրա խոսքից հատվածներ կան, որոնք ենթակա է հրապարակման: Հիմա կհրապարակե՞ք:

- Գիտեք ինչ, ես ստորագրություն եմ տվել որպեսզի չհրապարակեմ քննության տվյալները ...  Ես չեմ կարող ասել, որովհետև ստորագրել եմ նախազգուշացում, որ եթե հրապարակեմ, կարող եմ ենթարկվել քրեական պատասխանատվության: Ես ավարտում եմ խոսքս որովհետև արդեն մեղադրանքներ են հնչում և վիրավորանքներ: Ուրիշ իրավաբանի հետ խոսեք:

- Այսինքն նախագահը, եթե հանցագործություն է կատարվում, առհասարակ չի՞ ենթարկվում պատասխանատվության:

- Եթե հանցագործություն է կատարում՝ իր կարգավիճակից չբխող գործողությունների համար, ենթարկվում է, եթե բխող, ապա՝ ոչ:

- Մեղադրող կողմը բողոքելո՞ւ է վճռաբեկ դատարան:

- Կարծում եմ, որ կբողոքարկեն:

- Մարտի 1-ը չբխո՞ղ է:

- Սա բխող է, դրա համար օգտվեց անձեռնմխելիությունից:

Նշենք, որ Վերաքննիչ քրեական դատարանը Ռոբերտ Քոչարյանի խափանման միջոցը փոխելու վերաբերյալ պաշտպանների բողոքը քննեց երկու օր: